viernes, 19 de marzo de 2010

Taller d´escritura en llingua asturiana - Alderique final



El grupu de profesoráu asistente al taller d´escritura en llingua asturiana celebráu nel CPR d´Avilés, en febreru ya marzu, fizo un alderique na última sesión del cursu pa facer reflesiones sobre´l procesu d´escritura.
Pareznos del too aprovechables y ricos los comentarios que ficieron. Poro, invitámosvos a leelos, compartilos y tamién a escribir los comentarios que queráis nel blog


ALDERIQUE FINAL
DEL TALLER D´ESCRITURA N´ASTURIANU



"Normalmente, pa trabayar en clas la escritura, ponemos un títulu y dexamos que venga la hestoria, pero munchos nun son quien, cuésta-yos. Agora doime cuenta de qu´hai qu´intentar motivalos y que pa ello hai técniques".

"Veo que ye mui importante deprender a animalos a escribir. Llega la Selmana de les Lletres y pídinnos que l´alumnáu participe y yo nun vía la manera de dirixilos. Ye mui difícil. Avezámonos a trabayar col llibru de testu, a enllenar furacos y facer la programación en sin ellos ye difícil. Escribir a mi cuéstame sudores y eso que tengo vocabulariu, cultura… así qu´al alumnáu imaxinai. Tamién ye difícil dar clase porque como somos interinos cada año tócanos un sitiu y tenemos que partir de cero, nun sabemos lo que dieron ni a cual ye`l so nivel".

"Valoramos qu´hai munchos recursos pa secundaria y pa castellán, que ye la llingua `n que ta fondamente alfabetizáu `l nuesu alumnáu. N´asturianu cuésta-yos muncho más soltase. Nel cursu vimos idees, como los testos pa rellenar y tamién la posibilidá d´ellaborar nos materiales. Por exemplu da-y la vuelta a un cuentu y saca-y partíu".

"Ye mui importante trabayar na nuesa clas l´oralidá. La maestra o'l maestru va ser el modelu llingüísticu del alumnáu. Hai munchos exercicios y xuegos pa trabayar dende ehí. Por exemplu los xuegos de cartes con personaxes famosos d´Asturies, el de “¿Quién ye quien nel cuentu”, etc".

"Los pequeños son mui espontáneos pero a munchos cuésta-yos muncho escribir, dicen que nun-yos sal nada. Resúlta-yos un material nuevu o alcuentren el tiempu impuestu y ye perimportante da-yos tiempu. Tamién inflúi la forma de ser del profe, la distancia que marquemos con ellos".

"Cambia munchu `l resultáu de los sos trabayos si los ven tresformaos nun productu, entós cambia muncho la so entrega y la manera facelo (Por exemplu publicar nel blog d´aula)"

"Les actividaes, así aislaes, pueden funcionar dependiendo del día qu´escoyamos pa faceles, ye bono que sepamos encaxales en díes “propicios” pa ello y teneles preparaes".

"Ye interesante ver la clas como un trabayu en comuña más qu´individual. Les dinámiques de grupu son perimportantes nel nuesu trabayu pa xunir al grupu y face-yos entamar a trabayar. Ye mui recomendable afondar nel trabayu por proyeutos".

"En primaria faese mui positivo trabayar l´escritura grupal. Ver imáxenes, emociones y además da-yos pautes más sistemátiques de trabayu escritu".

No hay comentarios: